’O CCAFE’ SUSPESO, Fausto Marseglia

’O CCAFE’ SUSPESO

’O guaglione teneva ll’uocchie ’e chianto
e steva appujato nfaccia ô muro,
strigneva mmano na fiùrella ’e santo
e tremmava tutto quanto ’e paura.

’A ggente ca passava ’o guardava,
ma pensanno ca era nu drogato
se teneva luntano e se scanzava
lassannolo ancora cchiù scunzulato.

Nu raggio ’e sole era appena sciuliato
nfaccia a cchelli pprete tutte annure.
Ma ’o muro restava friddo e gelato,
e ’e mazzacane sempe cchiù scure.

Ô guaglione tremmavano ’e vvene
Ma nun era sulo p’’o friddo e ’o gelo.
Isso teneva ’nt’’o core na pena
e steva lla p’’aizà ’a preghiera ncielo.

Senza pate, ’a mamma appena morta,
steva sulo c’’o frate piccerillo.
Era asciuto ’nvucanno ’a bbona sciorta
pe se n’ascì ’a dint’a stu mastrillo.

Ma steva lla patenno friddo e famme
c’’o penziero d’’o frate piccerillo
senza putè cercà ll’aiuto ’e mamma
o puterse appujà a cchisto o a cchillo.

Steva quase perdenno ogni speranza
quanno s’avvicina n’ommo anziano
e parlannole doce cu crianza
l’aiuta a s’aizà stennenno ’e mmane.

Po’ s’’o porta chiano ’nt’a nu bar
e cchiamma nu bbellu cafè suspeso.
Se fa cuntà tutt’’a storia amara
nnant’ô barista ca era curtese.

’O patrone cercava nu guarzone
e, campanno sulo senza figli,
se pigliaje cu isso stu guaglione
nziemme ô frate facenno una famiglia.

Accussi, grazie ô cafè suspeso
e â bbuntà ’e chella brava ggente,
’a sagliuta addeventaje na scesa
e fernetteno ’e dulure e ’e stiente.

(F.M.)